TANE Konsumidor Sujere Estudante FCS UNTL Hamutuk Defende Direitu Konsumidor

Lafaek News—TANE Konsumidor hala’o sensiabilizasaun iha UNTL, Fakuldade Siensia Sosiais (FCS), Departamentu Komunikasaun Sosiál  hodi husu estudante sira servisu hamutuk hasa’e direitu no dever konsumidor iha konstrusaun merkadu.

Prezidente TANE Konsumidor, Antonio Ramos da Silva hateten, atividade TANE ninian hanaran programa “TANE sai ba dalan atu haree kona-ba konsumidor sira nia direitu no dever, intensaun Tane Konsumidor hala’o sensiabilizasaun iha UNTL tanba estudante nu’udar faze tranzisaun husi fakuldade ba servisu, ne’e duni  konsumidor ne’ebé konsiente kona-ba sira nia direitu no dever hodi reklama ka komplain keixa ruma.

“Dala barak ita nia konsumidor sira lor-loron hasoru problema kona-ba sira nia direitu no dever, oinsa mak ita bele reklama ka keixa ruma” dehan Antonio Ramos ba jornalista sira iha resintu UNTL kaikoli, segunda, (14/09/2020).

Antonio Ramos hatutan, atividade TANE konsumidor hetan apoiu husi União Europeia ho fundus 620, kompara ho dolar $.700 mill ho durasaun tinan 7 hodi kapasita konsumidor Timoroan sira, iha konstrusaun merkadu ne’ebé kompetetivu liu, hodi respeita nafatin sira nia direitu no interese.

Tan ne’e TANE Konsumidor hakarak servisu hamutuk ho estudante Departamentu Komunikasaun sosiál atu hakbesik ba konsumidor Joven sira, hodi hatene sira nia direitu ba konsumu aihan ne’ebé  saudavél ho folin ne’ebé barratu, no sira iha direitu ba atividade prestasaun servisu ne’ebé di’ak.

“Durante tama tinan rua ami simu keixa barak liu iha foin lalais estadu emerjensia nia laran, kuaze 80 ba 100, kona-ba husu informasaun no aprezentasaun keixa sira, nune’e ami konsege rezolve problema ne’e tuir idadak nia area” dehan Nia.

Enkuantu Dekanu Fakuldade Siénsia Sosiais, Camilo Ximenes Almeida, sujere ba estudante sira hahú ohin tenke muda komportamentu no mentalidade atu bele ko’alia buat ne’ebé la loos iha TANE Konsumidor hodi bele defende.

“Iha ita nia direitu fundamental kolia kona-ba ida ne’e, signifika katak ita nia direitu ne’ebé ita levanta ne’e presiza tebes atu tau atensaun, maibe realidade la’os ita Timor de’it maibe nasaun sira ne’ebé foin sai husi pós konflitu haré de’it ba kór no rasa hodi la defende direitu konsumidor nian” dehan Camilo Ximenes Almeida.

Jornalista        : Juvita dos Santos

Editora            : Nelya Barros

Tinggalkan Balasan