Públiku Deskonfia MS Inventa Kazu Covid-19, Odete “Ita Laiha Intensaun Atu Politiza”

Lafaek News—Ligadu ho preokupasaun ne’ebé viral iha media sosiál katak ministériu saúde politiza Moras Covid-19, maibé MS laiha intensaun politiza ema nia moras.

“Atu dehan de’it ministeriu saúde laiha razaun ida, ita laiha razaun atu politiza ema nia saúde, se ema ne’e moras ita dehan moras, se la moras ita deklara katak ema ne’e la moras,” dehan Ministra Saúde (MS) Odete Maria Freitas Belo ba jornalista sira iha palasio governu, kuarta, (19/08/2020).

Nia hatutan, bainhira sidadaun sira ne’e tama, Ministériu Saúde husu hotu-hotu tama karantina, kuantu liu ona loron sanulu resin ida halo teste ba sira, teste máka hetan kazu positivu entaun tuir protokolu ne’ebé mak iha tenke tama karantina loron 14, tanba ninia masa inkubasi ne’ebé iha, se iha duni transmisaun lokál iha fatin ne’ebé sira hela tan ne’e presiza hatene.

“Servisu ne’e tuir protokolu, ita laiha intesaun atu politiza buat sira ne’e, tanba la’os fasil halo tratamentu ba ema no mós halo vizialansia iha Óteis no uma ida-idak ne’e la’os fasil,” tenik nia.

Nia informa, ba sidadaun hotu labele halimar ho moras no jornalista sira mós hatene, katak oraganizasaun saúde mundiál dehan ita la fila ba moris ida uluk nian.

“Ha’u hatene imi kona-ba new normal, maibé prontu avansa ba oin, new nomal la’os ita to’o iha ne’e de’it, saida mak ministériu saúde tenke halo iha new normal ne’e, se kazu iha ita prevene nafatin atu virus ne’e labele tama iha ita nia rai laran,” nia fundamenta.

Enkuantu Ministra alerta ba ema hotu-hotu kumpri nafatin medidas ne’ebé ministeriu saúde no organizasaun saúde mundial fo sai.

Nune’e Odete relata, pasiente ne’ebé iha sala izolamentu teste dala rua ona resultadu negativu tan ne’e bele sai ona husi izolamentu.

Jornalista             : Pedro de Almeida

Asistensia Editór : Felisberto Fernandes da Costa

Tinggalkan Balasan