PR Promulga Dekretu Lei ANE Ba I.P

Lafaek News—Prezidente Repúblika (PR), Francisco Guterres Lú Olo, kinta (24/092020), promulga dekretu lei Autoridade Nasionál Eletrisidade (ANE) nu’udar Institutu Públiki (IP) atu asegura ezekusaun polítika nasionál setór enerjétiku garante regulasaun no fiskalizasaun produsaun.

Iha komunikadu  imprensa ne’ebé lafaek news asesu husi mídia ofisial palásiu prezidente repúblika, sita Autoridade Nasionál Eletrisidade, I.P, ho kna’ar atu asegura ezekusaun polítika nasionál setór enerjétiku, garante regulasaun no fiskalizasaun produsaun, transporte, distribuisaun, komersializasaun enerjia elétrika iha Sistema Nasionál Eletrisidade, no mós normalizasaun nasionál ba komponente instalasoins elétrikas.

Autoridade Nasionál Eletrisidade, I.P sei tutela ba membru Goveru ne’ebé responsabiliza ba setór enerjia elétrika. Institutu Públiku ne’e sei diriji superiormente husi Konsellu Administrasaun ho responsabilidade ba definisaun orientasaun jerál, no Konsellu Fiskla ba fiskalizasaun. Ba ezekusaun jestaun atividade ANE, I.P, sei asegura husi Diretór Ezekutivu, noemeadu husi ministru tutela, ho proposta husi Konsellu Administrasaun.

Setór eletrisidade nu’udar pilar ida ne’ebé fundamental tebetebes ba promosaun no dezenvolvimentu ekonomia País no instrumentu privilijiadu ba seguransa no bem-estar populasaun ninian, tanba ne’e, konsidera nu’udar servisu públiku esensiál. Tuir Dekretu-Lei númeru 13/2003, 24 setembru, ne’ebé estabelese Sistema Nasionál Eletrisidade ko’alia kona-ba prinsípiu báziku servisu universal enerjia elétrika ba populasaun no entidade públikas no privadas ba atividade iha setór oioin.

Estadu Timor-Leste mak ohin loron jere atividade setor enerjia elétrika. Iha posibilidade atu estabelese parseria ho setor privadu, espesialmente ba produsaun enerjia elétrika renovavel. Estadu sei kontinua tau matan ba integridade infraestruturas no fiabilidade ba fornesimentu. Tanba ne’e, autoridade reguladora sei sai fonte informasaun ba públiku no kualidade setór enerjia hodi kontinua halo fiskalizasaun ba atividades entidade públikas no privada ne’ebé opera iha setór ne’e.

Aleinde ne’e, estadarizasaun ba material elétriku no instalasoins elétrika sai nu’udar motivu ida hodi kria entidade ne’ebé estabelese naormas nasionais ba material elétriku no ninia utilizasaun no instalasaun hodi promove seguransa ba utilizasaun eletrisidade ba ninia sidadaun sira.

MÍDIA PR.

Tinggalkan Balasan