PNTL Bandu Joven Halo Barullu Iha Oras Deskansa

Lafaek News—Segundu Komandante PNTL Munisípiu Dili Superintendente Polísia, Euclides Belo, rekomenda ba inan-aman sira atu kontrolu oan sira ransu malu too kalan liu-liu oras deskansa, bainhira mosu problema polísia halo kapturasaun inkliui bolu inan-aman hodi justifika.

 “Tuku rua ka tuku tolu madrugada mak oan sira halo problema ami kaptura kedas oan no ami bolu hotu inan aman tanba ne’e inan aman sira tenke kontribui ba estabilidade la bele husik oan sira ba badiu tenke kontrola nafatin sira,”dehan Euclides ba Jornalista iha KMD kaikoli Dili, segunda (12/10/2020).

Superintendente polísia Euclides, afirma lei kona-ba protesaun ba labarik nian, iha ne’eba fó fiar ba labarik sira tanba inan-aman maka ema primeiru atu motiva nia oan sira tuir dalan loos.

Nune’e mós nia dehan, ema ne’ebé sempre toka múzika barullu halo komunidade sira la sente hakmatek, bainhira KMD simu informasaun sei haruka membru PNTL to’o kedas fatin ne’e hodi inteven.

Ema se mak halo serimonia iha bairu laran tenke hatene bairu ninia natureza, tanba ema balun presiza hakmatek se hakarak toka to’o rai loron aluga Delta Nova nune’e bele toka to’o rai loron, bele haksuit, bele mortal mos di’ak, tenke hatene fulan ida agora fulan nain feto nian.

“Iha sorin ema reza no kanta maromak nian maibe iha sorin fali toka muzika festa nian entaun ida ne’e la han malu tanba ne’e tau ita nia konsiensia tenke evita hahalok hanesan ne’e,” nia rekomenda.

Euclides esplika,Babain komunidade sira sempre komunika ba Komandu Munisipiu Dili entaun sira sei haruka kedas membru PNTL ba taka tiha festa refere nune’e la bele enkomoda ema seluk ne’ebe hakarak moris iha ambiente hakmatek.

 

Jornalista    : Orlando Magno

Editora        : Nelya Barros

Tinggalkan Balasan