ONU Lansa Spotlight Hakotu Violénsia Hasoru Feto

Lafaek News- Oragnizasaun Nasoens Unidas (ONU) ho inisiativa lansa spotlight iha Timor-Leste (TL) atu hakotu violénsia hasoru feto no labarik.

Tuir Koordenadór Nasoens Unidas iha Timor-Leste, Roy Trivedy, katak violasaun hasoru feto no labarik sira impede atinjimentu husi direitu umanu no dezenvolvimentu iha sosiedade.

“Timor-Leste no Nasoens Unidas iha inisiativa. Spotlight ne’e hanesan aprosimasaun foun ida atu alkansa igualdade jéneru iha espíritu unidade, parseria no mutuo husi ajénsia Nasoens Unidas hodi servisu hamutuk atu alkansa metas globál,” dehan Roy Trivedy ba Jornalista sira iha Hotel Timor, Kinta 05/03.

Iha fatin hanesan, Embaixadór Uniaun Europeia ba Timor Leste, Andrew Jacobs, sente kontente tebes tanba bele apoia esforsu Timor Leste nian atu halakon violénsia hasoru feto no labarik iha TL.

“Spotlight sei involve ema hotu-hotu inklui mane no labarik, tanba sira laiha ita sei la susesu, sosiedade ne’ebé livre husi violénsia bazeia ba jéneru ne’e sosiedade ne’ebé igual liu, ida ne’ebé ema hotu goza ninia direitu no oportunidade ne’ebé hanesan” dehan nia.

Tuir nia katak, violénsia bazeia ba jéneru hanesan violasaun direitu umanu ne’ebé dokumenta di’ak no sai bareira ida ba iha partisipasaun sosiál polítika no ekonómia, tanba ne’e mak inisiativa Spotlight sei hasa’e esforsu no hametin instituisaun atu asegura feto no labarik sira.

Enkuanntu Sekretária Estadu ba Igualidade no Inkluzaun, Maria José da Fonseca Monteiro de Jesus, hatete violénsia hasoru feto no labarik hanesan violasaun direitu umanu ne’ebé boot liu, kontinua akontese no fó problema ba mundu.

“Ida ne’e hanesan dezafiu prinsipál ida ba iha realizasaun direitu husi feto no labarik atu atinje objetivu dezenvolvimentu sustentavel, ha’u apresia tebes inisiativa spotlight ne’e, ne’ebé ho kompromisu Governu Timor Leste atu promove no proteje dignidade no direitu feto,” katak nia.

Jornalista   : Joaninha da Silva

Editór         : Iruk Carvalho

Tinggalkan Balasan