Nilton Leba Modo Husi Balibar Faan iha Taibesi

Lafaek News-Nilton Soares ho idade sanolu resin ida (11), hela iha Balibar,  postu admistrativu Laulara, Munisípiu Aileu ne’ebé ajuda nia avo lokraik-lokraik leba modo tun mai faan iha merkadu taibessi atu bele sosa netik kadernu ho lapizeira.

“Ha’u eskola dader ne’ebe, lokraik ne’e, hau lori modo husi balibar tun mai faan iha merkadu taibessi, depois osan ne’e ha’u nia avo mak rai hamutuk, hau presiza sosa kadernu no lapizeira mak ha’u husu  fò ha’u. tanba hau hela ho avo mak eskola, hau nia pai ho mãe hela dook tebes husi eskola,” haktuir Nilton Soares ba Lafaek News, iha merkadu taibessi, Kinta (19/12)

Nilton Soares moris iha balibar ho idade 11, estudu iha Eskola Báziku Filiál (EBF) balibar postu admistrativu laulara klase V, husik hela inan-aman ba hela ho nia avo hodi hala’o peregrinasaun moris hanesan ema negosiante nia oan.

Iha merkadu taibessi liu husi atividade lokraik-lokraik faan modo atu hetan netik osan hodi ajuda avo ba nessesidade baziku inklui sosa material eskola nian.

Faan modo ne’e la’os tuur de’it iha fatin, sé tuur de’it iha fatin ema ladun sosa tanba ema barak mak faan modo, ema atu sosa lalais ne’e tenke lori la’o ba mai atu nune’e ema sosa hotu lalais para fila sedu uma tanba hela do’ok, loron ida modo futun rua nulu ema bele sosa hotu.

“Ha’u tenke lokraik-lokraik la’o ba taibessi hodi faan modo, maibé labele tuur nonok de’it tenke hakilar modo futun ida $ 50 cen atu ema bele sosa lalais, ha’u la mo’e bastante ema sosa, dala ruma loron ida hetan $ 8-10,” katak nia

Nia dehan, labarik kiik balun mo’e no tauk atu faan modo no sira garante de’it ba nia inan-aman, maibè see la buka osan, sé mak atu selu no sosa mós material eskola nian inklui mós farda eskola.

“Ha’u tenke faan modo sé la faan, osan laiha no ha’u nia roupa foun loron bo’ot nian mós laiha nomós kadernu lapizeira,” hakotu nia

 

Jornalísta            : Joaninha da Silva Sarmento

Editór                  : Manico Ximenes

Tinggalkan Balasan