MEJD Prevensaun Covid-19, Eskola ba Uma

Lafaek News – Ministra Edukasaun Juventude Desportu, Dulce de Jesus, suspende prosesu aprendizajen iha edífisiu eskola nian atu halo prevensaun ba Covid-19, maibé estudante labele lakon espíritu vontade atu estuda iha uma.

“Prevensaun virus korona la signifika prosesu aprendizajen mós para, maibe estudante sira kontinua aprende maske iha uma,” MEJD Dulce Soares ba jornalista sira liu husi komferénsa imprensa iha Sentru Konvensaun Dili, kuarta (8/4).

Governante dehan Timor Leste hanesan nasaun sira seluk iha mundu tomak luta hasoru Virus Corona ne’ebé amesa ba saude públiku li-liu futuru estudante sira nian ho razaun ne’e MEJD deside suspende prosesu aprendisajen, maibé fiar katak programa eskola ba uma liu hosi kanál telvizaun, rádiu no website ho material oi-oin hodi fasilita estudantes sira iha uma.

Ministra edukasaun ne’e mós rekonese sistema sei iha failanu no limitadu, maibè governu liu hosi MEJD sei had’a no atualiza sistema ne’e atu fasil estudante sira atu uiliza maski la perfeitu.

“Ha’u rasik rekonese no espera komunidade mós rekonese, no ministériu esforsu tomak atu garante prossesu aprendisajen lapara no prosseu aprendisajen tempu agora muda ba uma,’’ katak Dulce

Ministra ne’e mòs husu ba inan aman atu kontribui ba prossesu aprendizajen liu hosi televizaun no internet inklui asiste programa eskola ba uma ne’ebé fó sai kada loron iha kanál RTTL, GMNTV  inklui TV Edukasaun.

“Prograna sira ne’e la’os halimar no la’os passa tempu de’it no agora la’os tempu feiras, maibe programa sira ne’ebé fó sai tuir kurikullu nasional husi primeeiu periodu nune’e obrigatoriu atu asiste,’’ Dulce salienta.

Aleinde ne’e Ministériu Dukasaun Juventude no Desportu, estabelese nùmeru kontaktu gratuita12100 hodi fasilita estudante bele husu bainhira iha konfuzaun ba materia ne’ebè estuda iha uma.

“Lina telefone dedikadu numeriu 12100 ne’ebé kontakta gratuita ho pergunta ka duvida ruma ba materia ne’ebé ita boot sira estuda, no bolu hato’o kestaun no operador sei rejista envia ba painel espertu pedagójiku sira atu fó fali resposta ba estudante sira,’’ tenik nia.

Dulce dehan, iha familia no estudante husi porsentu 20-30, ne’ebé sedauk iha assesu ba internete ministériu sei fasilita distribui liviru ba area rurais no servisu ho parseiru sira atu imprime livru balun iha tempu badak hodi fahe ba estudantes sira.

MEJD mós prepara hela estratejia atu eskola sira li-liu estudantes sira iha area remotas hodi kontinua fó apoiu prossesu aprendizajen no kumpre regras estadu emerjensia. Ministra edukasaun mós imforma, prova ba avaliasaun ba primeiru periodu, tuir kalendariu eskolar prova ne’e hahu iha semana oin husi loron 13 too loron 18 Abril 2020.

“Kona-ba prova ne’e hau sei hatun despaisu ida ba prova primeiru periodu maibe depende ba desijaun estadu emerjensia,” katak ministra ne’e

Dulce hateten tuir planu ministériu edukasaun nian kona-ba prova ne’e sei muda ba loron 20 too 25 fulan Abril ka bele iha fulan maiu 2020.

“Ami sei hein desizaun final maibe lalika preokupa ba prova avalisaun ba periódu sei la’o nafatin ba estudante sira hotu,” nia hakotu.

 

Jornalista : Pedro Almeida

Editòr : Nelya Barros

 

Tinggalkan Balasan