Laiha Edifísiu Propriu, Komunidade-Profesór Kontribui Osan Harii Uma Provizóriu

Juventude sira kahur hela sementi hodi harii hela Eskola Sekundáriu Jerál Sezar Mau-Laca Lete-Foho, Munisípiu Ermera. Foto LN/João da Costa Soares

Ermera (Lafaek News)-Durante Eskola Sekundáriu Jerál Sezar Mau-Laca Lete- Foho, Munisípiu Ermera, laiha aula permanente entaun inan-aman sira hamutuk ho Profesores kontribui Osan uituan hodi harri uma provizóriu ba Estudante sira.

Tuir Diretór Eskola Sezar Mau-Laca, Lete- Foho Ermera, Antonio Manuel Soares ba Jornalista Lafaek News, Kuarta (15/07/20), dehan, desde Tinan 2003 Eskola ne’e harii to’o ohin loron Governu seidauk iha biban atu halo Kontrusaun ba Eskola refere.

“Entaun Ha’u organiza Inan-aman apoiu osan uitoan iha fulan Fevereiru ne’e, ami konsege tau fatuk ain, provizoriamente agora dadaun iha ona sala neen (6) tuir kbi’it Inan-aman, Profesór ho Estudante sira nian” dehan Diretur ne’e.

Nia mós dehan, durante ne’e la’ós hetan apoiu husi inan-aman de’it, maibé hetan mós apoiu Rai-henek semente fatuk, hosi Emprezáriu no Kompañia sira hanesan Lete- Foho oan.

Tuir Diretór Eskola, durante Eskola ne’e hamriik sira hahu okupa provizóriu edifísiu Ensino Baziku 30 Lete-Foho hodi halo aprendizazen, ikus mai iha mudansa hodi okupa edifísiu Eskola Primaria Kalohan Lete-Foho nian iha tinan 2014 hodi kontinua aprendizazen to’o ohin loron.

Iha tinan 2012, sira hetan kadeiras no meza hamutuk atus tolu (300) ho Estudante ne’ebe mak naton.

Nune’e mós, Estudante Calista de Fatima, hatete, difikuldade ne’ebé sira hasoru mak edifísiu ba sira laiha, menus Profesores, livru inklui atividades desportu sira.

“Ami ejiji ba Ministériu kompetente atu tau matan ba ami nia edifísiu ne’e, ho kondisaun ne’ebé mak di’ak atu ami bele tuir aprendizazen ho di’ak,” Calista dehan.

Total Estudante agora Hamutuk atus neen resin lima (565), profesor Permanente sanulu (10), inklui Voluntáriu Na’in  ha’at (4).

Nune’e, husu nafatin ba Ministériu Edukasaun (ME), maske eskola hotu iha Timor laran hetan difikuldade, maibé sira husu atu tau mós prioridade ba Eskola sira nian.

 

 

Jornalista  : João da Costa Soares

Editor         : Paqhar Malay

Tinggalkan Balasan