Konfrontu Iha Baukau Rezulta Ema Ida Kanek Todan

Xefe Suku Triloka, Alexandre da Costa / Foto LN : Venancio Belo

Baukau (Lafaek News)-Konfrontu entre grupu iha Suku Triloka, Postu Administrativu Baukau Vila, Munisípiu Baukau rezulta ema ho naran Januario da Costa Alves (31) kanek todan parte ulun tanba suspeitu ta’a ho katana. 

Iha insidente ne’e rezulta vitíma Januario da Costa Alves tinan 31 sofre kanek todan iha ulun tanba ta’a katana.

Tuir Xefe Suku Triloka, Alexandre da Costa ba Lafaek News, hatete, iha akontesementu ne’e, motivu joven na’in rua hosi aldeia Aubaca ba joga bola voly iha area makadai hafoin akontese problema baku malu no joven na’in rua nee fila konvida nia maluk sira hodi halo kontra atake ba malu.

Hosi rezulta konfrontu ne’e, rezulta vitíma kanek todan. nune’e xefe suko ne’e deskonfia kazu atake malu entre Grupu Arte Marsiais (GAM).

“Motivu ne’e akontese joga bola boly mak hamosu problema tanba ita intérpreta sala hodi haree ba buat seluk tanba aldeia Aubaca la’o liu suku mak foin to’o makadai ne’ebá, ita bele haree iha tempu ikus-ikus ne’e, ita haree problema uluk nian ne’ebé ita deskonfia grupu arte marsiais,” haktuir Xefe Suku Triloka, Alexandre da Costa ba Lafaek News,  iha sede suku Triloka, Kuarta (13/05) iha nia kna’ar fatin. 

Iha sorin seluk, enfermeiru sala emerjénsia Óspital Rejionál Eduardu Ximenes Baukau (OREXB), Mario Belo, hatete, vitíma Januario da Costa Alves mai ho kondisaun grave tanba ran faka’ar maka’as halo vitíma dezmaia, no doutór sira hlo kedas operasaun hodi suku kanek ne’e, iha pontu sanulu resin ida (11).

“Kazu ta’a malu iha triloka depois ne’e pasiente evakua mai iha sala emerjénsia óspital  Baukau iha tuku hitu kalan, pessoal saúde doutór no infermeiru sira ne’ebé oráriu kalan halo kedas atendementu ba pasiente nia kanek iha parte ulun, ne’ebé doutór sira suku nia naruk sentimu sanolu resin ida,” nia akresenta

Iha akontesementu konfrontu ne’e, Polísia Eskuadra Baucau Vila, konsege kaptura ona joven na’in lima ne’ebé mak deskonfia involve iha kazu insidente ne’e. 

 

Korespondente : Venancio Belo

Editór                  : Manico Ximenes

 

Tinggalkan Balasan