KM Aprova Projetu Deliberasaun Prevene ba Violénsia Jéneru

Lafaek News–Oitavu governu konstituisional ne’ebe lideradu Primeiru Ministru (PM), Taur Matan Ruak, liu husi reuniaun konsellu ministru aprova ona projetu deliberasaun relativa ba prevensaun no resposta ba violénsia bazeia ba jéneru  iha Timor-Leste.

 Ministru Prezidensia Konsellu Ministru (MPKM), Fidelis Manuel Leite Magalhães, dehan projetu deliberasaun ne’ebe aprova iha konsellu ministru kona-bá relativa kontra violénsia bazeia ba iha jenéru iha ne’ebé apresenta husi Sekretária Estadu ba Igualdade no Inkluzaun, Maria José Fonseca Monteiru de Jesus, iha palasiu governu iha loron kuarta, (21/10/2020).

“Projetu ne’e atu kontribui ba prevensaun violénsia  bazeia iha jéneru no disponibilidade rekursu ne’ebé sufsiente destina ba implementasaun no monitorizasaun lejizlasaun no polítka sira kona-ba violénsia bazeia iha jéneru iha espasu públiku sira,” hateten Fidelis Manuel Leite Magalhães, ba jornalista sira hafoin reuniaun konsellu ministru iha kuarta semana ne’e.

Governante mos relata, espesiál atensaun ba feto sira iha situasaun vulnerabilidade boot ne’ebé konsidera ninia kondisaun fízika no mentál no sira hela iha área ne’ebé iha risku boot ba dezastre Natural, no projetu ne’e tau orsamentu montante millaun 7,7, durante iha fulan 48 nia laran.

“Projetu ne’e iha durasaun fulan 48 no orsamentu totál dolar amerikanu hamutuk millaun 7,7,” tenik nia.

Nia hatutan, projetu ne’e sei implementa husi UN Women Timor-Leste, iha koordenasaun ho Sekretaria Estadu ba Igualdade Jenéru no Inkluzaun, iha parseria ho ajénsia nasaun unidas sira seluk no iha kooperasaun ho Ministériu no Instituisaun públiku sira seluk ne’ebé relevante, nune’e mós organizasaun sosiedade sivíl.

Nune’e nia informa, projetu ne’e, integra iha ámbitu Planu Asaun Nasionál nian kona-ba violénsia bazeia ba jenéru, ho potensiál atu hametin implementasaun planu multisetorál sira ne’ebé dezenvolve no lidera husi Governu, ho ida ne’e konsellu ministru halo reflesaun nune’e estadu timor leste asegura liu tan.

“Konsellu ministu mos halo reflesaun klean kona-ba espasu publiku sira atu oinsa estadu Timor Leste bele asegura liu tan katak espasu publiku ne’e la’os sai fali fatin ba violasaun ba ita nia feto sira iha ita rai, maibe fatin ne’ebe  sira seguru bele iha mobilidade atu labele sente tauk no hetan persigsaun iha atividade loron-loron,” dehan nia.

Minstru fundamenta, konsellu ministru mos apela ba SEII no mos parseiru desenvolvimentu sira hotu atu fokus makas atu bele iha kampaña nasionál ida ho insiativa ne’ebe konsertada duni atu halo konsesializasaun hodi hapara ka redus violénsia bazeia ba jeneru.

 

Jornalista     : Pedro de Almeida

Editora          : Nelya Barros

Tinggalkan Balasan