Kada Tinan SSM Baukau Rejistu Kazu Lepra 20 Ba Leten

Lafaek News- Asistente Programa Moras Lepra, Jeremias Mangalhães, informa kada tinan Servisu Saúde Munisípiu (SSM) Baukau rejistu kazu moras lepra na’in 20 ba leten.

“Timor Leste deklara elimina ninia prevalénsia menus ona, maibé munisípiu Baukau hahú hosi 2010 ita iha kazu 1.43. Ho situasaun ida ne’e, hahú iha tinan 2017 to’o 2020 ne’e ita-nia kazu seidauk bele redúz to’o menus hosi totál populasaun dez mill, entaun kada tinan ita rejistu kazu foun ba moras lepra hamutuk 20 to’o 24 kada tinan,” informa Jeremias ba Lafaek News iha nia kna’ar batin, Segunda, 29/06.

Nia informa, tuir dadus ne’ebé Ministériu Saúde rejistu kona-ba moras lepra iha Timor Leste, munisípiu Baukau mak oukupa terseiru lugar hafoin Oe-cusse no Manatutu.

Tuir nia katak, kazu moras lepra aas iha munisípiu Baukau tanba tuir prevalénsia kada tinan detekta kazu mínimu ema-nain 20 hosi populasaun rihun ida.

“Moras lepra iha munisípiu Baukau bazeia ba indikadór ne’ebé mak atu sura prevalénsia moras leproju ninian, iha tinan 2017 prevalénsia moras lepra munisípiu Baukau liu pontu 1.79, enkuantu mai iha tinan 2020 prevalénsia moras lepra ne’ebé detekta 0.50,” nia esplika.

nia dehan, maske númeru kazu lepra kontinua sa’e, maibé servisu saúde munisípiu Baukau kontinua fó tratamentu di’ak ba pasiente sira, no husu atu nafatin badinas hemu aimoruk ne’ebé mak doutór sira fahe ona.

“Profisionál saúde munisípiu Baukau kontinua esforsu-an hodi fó atendimetu di’ak ba pasiente moras lepra ne’ebé oras ne’e daudaun enfrenta moras ne’e,” nia promete.

Enkuantu, tuir dadus ne’ebé iha, munisípiu Manatutu mak sai primeiru lugar ba kazu lepra, tanba ho prevalénsia moras lepra detekta pontu 3.50, Oe-cusse prevalénsia pontu 2.38 no munisípiu Baukau ho prevalénsia moras lepra pontu 1.79.

 

 

Jornalista   : Venancio Belo

Editór           : Lino Aparicio

Tinggalkan Balasan