Jacinto Kestiona KFP Anula Kargu Sekretáriu Administradór Lautém

Lautém-(Lafaek News)—Sekretáriu administradór foun munisípiu Lautém, Jacinto da Costa, kestional Komisaun Funsaun Publika (KFP), nomea ona nia assume kargu ne’e, ikus anula hikas kargu sekretáriu administradór munisípiu Lautém ho razaun tanba la tuir kuridór legál.

“Asuntu ida ne’e iha loron 1 de Outubro ha’u simu ona katak nomeasaun mai husi funsaun públika asume kargu nu’udar sekretariu munisípiu hahú husi 1 Outubro ho 31 de dezembru, maibé despaisu dehan atu anula fali tuir nota informátika mak husi  MAE durasaun rekursu umanus hato’o katak komisaun funsaun públika sei verifika fila-fali desizaun ne’ebé sira halo, depois ha’u mós rona ona katak Prezidente komisaun sei anula fila-fali nia desizaun ne’e tanba desizaun polítika, maibé prosedimentu legal ne’e mak seidauk prense rekezitus,” esplika sekretáriu administrdór munisípiu Lautém, Jacinto da Costa, ba Lafaek News foin lalais iha Lautém.

Jacinto dehan, informasaun kona-ba anula hikas kargu administradór ho sekretáriu Lautém ne’e seidauk iha karta legal, tanba kontinua ezerse funsaun hodi hein desizaun final.

“Ha’u rona sesta feira semana kotuk anula, maibé too  ohin karta legal ruma seidauk iha ha’u nia liman,” nia argumenta.

Nia dehan, bainhira iha duni desizaun katak iha anulasaun husi KFP ne’e hatudu rezultadu ikus katak desizaun la tuir kuridór legal, no renomeia hikas sekretáriu administradór ida uluk nian, nia sei fila hikas ba diretór fiskalizasaun munisípiu Lautém hanesan bai-bain.

“Dokumentus seidauk iha ha’u nia liman, primeiru konkorda ka la konkorda, ne’e desizaun superior hanesan funsionáriu públiku ha’u obedese más hanesan ema sertu ne’e kestionável, tanba afeta ba ema nia dignidade pesoal, katak semana ida sai sekretariu depois hala’o fali hanesan ne’e,” Jacinto kestiona.

observasaun lafaek news sita katak funsionáriu hotu iha admnistrasaun munisípiu Lautém kontinua dúvida ba desizaun ne’ebé komisaun funsaun públika hasai ona, maibé lla too semana ida anula fali desizaun refere.

 

 

Jornalista     : Elidio Castro

Editora          : Nelya Barros

Tinggalkan Balasan