IGE Ho SEKOMS Aborda Programa Naroman ba Suku

Lafaek News—Instutu Jestaun Ekipamentu (IJE), Kuarta (14/10/2020), hasoru malu ho Sekretáriu Estadu Komunikasaun Sosiál (SEKOMS), hodi aborda kona-ba insfraestrutura hodi realiza programa naroman ba suku.

.Prezidente IGE,  Ermenegilda da Costa Laurentina, hateten IGE hanesan Institutu Públiku ne’ebé tutela ba Ministériu Obras Públikas (MOP), tanba ne’e bainhira atu halo servisu ruma tenke hetan orientasaun husi Ministru Obras Públikas, tanba IGE nia apoiu atu solusiona preokupasaun ne’ebé komunidade husi suku aprezenta liu-liu ligadu ho estrada no servisu seluk ne’ebé iha relasaun ho IGE nia kompeténsia.

“Ha’u sente kontente tanba bele hola parte iha programa ne’ebé inísia husi SEKOMS liuliu liga ho servisu IGE nian iha atendimentu emerjénsia, reabilitasaun estrada, normalizasaun mota no seluktán,” dehan Prezidente IGE Ermenegilda liu husi enkontru  iha sala reuniaun SEKOMS, Palásiu Governu, Dili. kuarta (14/10/2020).

Iha enkontru ne’e Prezidente IGE  ne’e mós kestiona, servisu mídia nian ne’ebé foti de’it notísia kona-ba kondisaun estrada no ponte ne’ebé kotu, maibe mídia sira la foti notisia bainhira IGE halo reabilitasaun estrada, ponte no seluk tan.

“Hafoin IGE halo intervensaun ba problema hira ne’ebe ita nia komunidade sira hasoru husi parte IGE hadi’a estrada no ponte, mídia la halo atualizasaun ba notísia ne’e,” dehan prezidente IGE.

Hatan ba preokupasaun husi IGE ne’e, Sekretariu SEKOMS, Merício Juvinal dos Reis AKARA hateten, SEKOMS iha papel importante atu mobiliza mídia hodi divulga atividade governu nian, tan ne’e husu ba mídia sira liuliu mídia estatál hanesan RTTL-EP, TATOLI-I.P no Rádiu Komunidade sira atu atualiza nafatin atividade governu nian hodi hatan ba preokupasaun komunidade nian.

AKARA informa, SEKOMS sei halo diálogu komunitáriu iha suku rua hanesan suku Soikili no Euquisse iha Laivai, munisípiu Lautem ne’ebé sai mós alvo ba programa Naroman ba Suku, tanba ne’e sei konvida mós IGE atu partisipa iha diálogu ne’e hodi rona preokupasaun husi populasaun.

“Fó hanoin hikas fali katak, Naroman ba Suku hanesan programa prioridade ida husi SEKOMS ne’ebé ho intensaun atu fasilita komunidade suku asesu ba informasaun kona-ba prosesu dezenvolvimentu nasionál no lori Governu besik ba povu,” Nia afirma.

Hafoin implementasaun programa Naroman ba Suku, IGE halo ona intervensaun hodi hadi’a estrada iha suku Muapetini, munisípiu Lautem ne’ebé atinji ona porsentu 75 no planu sei reabilita mós estrada iha suku Lore 2, hafoin ekipa tékniku IGE halo monitorizasaun.

Jornalista   : Orlando Magno

Editora       : Nelya Barros

Tinggalkan Balasan