Durante Semana Ida PNTL Kaptura Membrus Arte Marsias Na’in 14

Lafaek News—Komandante Jerál Polísia Nasionál Timor Leste (PNTL), Komisáriu Faustino da Costa, informa durante semana ida nia laran PNTL kaptura membrus arte marsias ema na’in 14 iha fronteira Batugade.

“Iha situasaun emerjénsia ita hotu-hotu akompaña liu-liu ba area fronteira tanba ne’e mak atu aproveita dehan katak iha semana ida nia laran ita halo kapturasaun ilegal iha fronteria ne’e total 14 pesoas,” katak komisáriu Faustino da Costa, ba jornalista sira hafoin remata enkontru ho Prezidente Repúblika iha palasiu prezidénsia Bairru-Pite, kinta (15/10/2020).

Faustino afirma, ema sira ne’ebé PNTL kaptura iha fronteira maioria Timor oan no iha indikasaun lori atributu arte marsiais inklui estudante balun ne’ebé kontinua hela estudu iha indonézia.

“Ilegais tama sai hamutuk ema na’in14, sira ne’e mesak Timor oan no da-daun sira iha kuarentena,” dehan Komandante PNTL ne’e.

Faustino reafirma tuir dekreta governu nian ema sira ne’ebé tama sai illegal bainhira hetan kapturasaun sei submete ba kuarentena perante loron 14, bainhira kompleta ona kuarentena sei selu multa ho $.50 too $250.

“Ita mos aplika ona klaru primeriu nia tama, tanba tuir medidas prevensaun ne’ebé dekretu governu iha sira sei selu multa kuandu nia kompleta loron 14, sira mak gasta sira nia osan rasik iha ne’eba i depois tanba iha ne’ebe kiik liu $.50 too $250 dolar,” katak nia.

Jornalista  : Zeferino Barreto Gomes

Editor        : Nelya Barros

Tinggalkan Balasan