Deputadu Ladun iha Kualidade Debate OJE 2020

Lafaek News-Deputadu ne’ebé mak reprezentante Povu iha Parlamentu Nasionál (PN) barak maka ladun hatudu kualidade di’ak ba dabate Orsamentu Jerál Estadu (OJE) 2020.

Vise Diretór Asosiasaun HAK, Sisto dos Santos, hatete deputadu PN laiha informasaun sufisiénte husi baze hodi ba debate OJE 2020 nian.

“Kuaze deputada sira barak mak ladun hatudu kualidade nu’udar lejisladór, pratikamente deputadu sira nia kualidade debate iha plenária la hatudu esénsia ne’ebé profunda,” dehan Vise Diretór HAK liu konferénsia imprensa, Kinta (16/01) iha farol, Díli

Nia haktuir, situasaun plenária sai hanesan diskusaun bai-bain hanesan husi ema bai-bain ho asuntu bai-bain, fenomena ne’e la hatudu kualidade plenária, tanba asuntu sira ne’e foti husi kada bankada la hatudu esénsia no subtánsia husi situasaun no realidade ne’ebé povu iha nevel.

Iha postu administrativu, suku no aldeia sira problema ne’ebé mak sai preokupasaun fundamental komunidade nian, desde tinan 10 resin ba kotuk mak hanesan asuntu edukasaun, saúde, bee moos no irigasaun.

Nune’e, setór sira ne’e mós mak liga direita ba povu nia moris, situasaun husi setór hirak ne’ebé ami seidauk konsidera husi ukun ida ba ukun seluk, tanba ne’e efeitu bo’ot ba povo nia moris.

“Ita nia ddukasaun kontinua laiha kualidade fasilidades la sudsiénte hanesan merenda eskolar kontinua sai problema, bee no saneamentu eskola nia la di’ak, klinika, sentru saúde, Hospital referal no hospital nasionál kontinua infrenta fasilidade la subfiente, Ai-moruk kontinua la iha, nune’e tenke obriga povu kbiit laek sira ba konsulta, tenke ba sosa aimoruk iha klinika privadu sira,” nia dehan

Nia hatutan, povu iha area rural no urbanu kontinua halerik ba bee moos tanba Governu la investe orsamentu ba setór importante ne’e, maibé entrega fila fali setór ne’e ba ajénsia internasionál sira hanesan ADB ne’ebé ikus mai, setor ne’e sei privatiza povu tenke selu.

Iha mós irigasaun sira la konsege hadia hodi efeitu ba produsaun agrikola la sa’e tanba kada tinan tenke importa ai-han no nesesidade baziku sira seluk ne’ebé konsumidór la iha informasaun serteza kona-ba kontaminasaun veneno ne’ebé perigu ba ema nia saúde,.

“Ho situasaun hira ne’e hotu, ita nia nai deputadu sira la tau atensaun ba ho sériu hodi debate iha plenaria ho kle’an no kritiku,” nia hakotu

 

Jornalísta   : Sandra da Costa Barros

Editór         : Manico Ximenes

Tinggalkan Balasan