Defensor Direitus Umanus Nakfilak Ba Violasaun Direitus Umanus

(Artigo Ida Refere Liu Ba Hadau Poder PPN Foun Maio 2020 Liubá)

Husi : Moisés Vicente

Introdusaun

 Durante tinan barak nia laran, Repúblika Demokrátika Timor-Leste (RDTL) luta ba ukun rasik to’o restaurasaun Independénsia iha loron 20 de Maio de 2002 nia alvu prinsipal maka povu livre, Estadu RDTL hamriik, respeitu Lei no moris di’ak ba povu. Asembleia Konstituente eleitu iha tinan 2001 liuba hodi aprova Konstituisaun RDTL nu’udar matadalan ba Estadu Repúblika Demokrátika Timor-Leste.

Parlamentu Nasionál nu’udar Orgaun Legisladora ne’ebé ho nia kompetência exclusivu atu halo lei, kondus politika no halo fiskalizasaun. Membru Parlamentu Nasional mai husi partidu politiku sira ne’ebé hetan votus liu bareira votus eleisaun Parlamentar nian. Nu’udar segundu orgaun suberanu Parlamentu Nasionál sai aat liu ne’ebé pratika Deputadu/a reprezenta partidu sira.

Dala barak ona povu deskontenta ho aktu polítika sira ne’ebé Deputado/a sira kondus, halo lei legaliza dada osan estadu ba sira nia bolsu ‘Pensaun Vitalisa’ maske sira konsiente katak ne’e hanesan traisaun hasoru nia povu, maibé sira la sente-an katak aktu ne’e hanesan mo’e ida. Parlamentu Nasionál goza direitu regalia oi-oin, kareta gratis, komputadór, komunikasaun, tratamentu saúde, agora halo tan uma ba sira nia-an. Maibé rezultadu saida maka Parlamentu Nasionál halo ba povu, laiha, zero! han osan saugate deit!.

Rezultadu husi servisu Parlamentu Nasionál nia maka sai portavos, sai reporter, joga malu, asalta poder no hadau meja, ne’e sai hanesan lolos labarik zaman now sira halimar TikTok. Ne’e maka dehan wow duni! Exemplu wow husi Parlamentu Nasionál nia maka hodi la respeitu lei, halo ekplorasaun ba povu nia sakrifisiu, no buka hakarak sa’e lalais ba tuur sa’e ba iha tutun. Maibé tamba poder lanu sira, sira taka matan no taka tilun hodi sobu. Rezultadu husi halo rahun meja Parlamentu Nasionál, hadau poder, no troka meja foun Parlamentu Nasionál maka mosu Governo ai-tongka tuir politiku sira nia liafuan Governo defaktu no Parlamentu Nasionál defaktu. Tamba sa mak bolu defaktu?

 Perguntas bo’ot ba ita hotu mak ne’e tamba sa to’o agora atual (PPN-Prezidente Parlamentu Nasionál) la halo toma posse? Ida ne’e ita nia atual Prezidente Parlamentu Nasionál, Dr. Aniceto Guterres maka bele esplika. Maibé aktu sira husi Parlamentu Nasionál nia durante ne’e halo deit Estadu RDTL ne’e sai fraku, bei-beik sei rai hela deit lisaun a’at ba povu Timor-Leste. Ita ko’alia kona-bá direitus humanus, ko’alia kona-ba hahalok a’at ka atrosidades ne’ebé kontinua mosu iha mundu tomak. Timor-Leste labele emita halo sira ne’ebé la lei, kontra valores sira kona-bá direitus umanus ne’e uluk asuwain FALINTIL sira defende, joven resistensia sira, no mós aktivista diretus umanus sira defende. Parlamentu Nasionál tenke hamosu polítika ne’ebé dignu hodi defende dignidade Estadu RDTL nia.

Perguntas bo’ot ba sidadaun Timor-oan hotu, tamba sa to’o agora atual (PPN-Prezidente Parlamentu Nasionál) la halo toma posse?. Sera que ida ne’e la’o tuir dalan legál ka ilegál? Ida ne’e Ita nia atual Prezidente Parlamentu Nasionál, Dr. Aniceto Guterres maka bele esplika ba públiku em jeral ka ba povu doben Timor-Leste. Nasaun Repúblika Demokratika Timor-Leste nudar nasaun foun liu ida iha mundu no maski sai hanesan modelu ba demokrasia iha Rejiaun Sudeste Aziátiku, nasaun nia kapasidade institusionál sei fraku.

Ita ko’alia kona-bá direitus humanus, ko’alia kona-ba hahalok a’at ka atrosidades ne’ebé hala’o no kontinua mosu iha mundu tomak. Babain monu iha loron 10 Dezembru nudar loron ida atu refleta kona-bá deklarasoens ne’ebe fó brani atu hetan direitus, respeitu no dignidade atu nudar bele sai hanesan liu tan ba ema hotu.  Deklarasaun Univsersal Direitus Umanus deklara nudar “padrao hanesan atu hetan husi ema no nasaun hotu”. Maibe pratikamente iha nasaun Timor-Leste ses ona, valores sira ne’e ne’ebe Timor-Lesta adopta hela. Atual Prezidente Parlamentu Nasionál uluk defende makas ba direitus umanus ba povu Timor-Leste nian no agora kontra fali no nakfila ba violasaun direitus umanus?.

Funu ba poder polítiku seidauk iha nia rohan, politiku nain sira kala neon mate ona, tamba sira hatene maka sa’e ba leten no tauk hakruuk ba kotuk entaun susar sira bele hare hetan terus ne’ebe dadaun ne’e povu hasoru. Laiha hahan, merkadu la dun di’ak, tamba Corona COVID-19, maibé sukit malu, hadau kadeira, povu priveileisu maka sai objetivu prinsipal ba ukun nain sira.

Agora povu presiza dezenvolvimentu, oan sira presiza eskola, tratementu ba moras sira, no produsaun ba agrikula, ne’e presiza hetan tulun husu Estadu RDTL, maka tenke iha Orsamentu Jeral Estadu nia. Parlamentu Nasionál debate dadaun ona, serake aprezentasaun fila-fali OJE 2020 legál? Agora Prezidente Parlamentu Nasionál rasik seidauk hetan simu pose husi Prezidente Repúblika (PR).

Ida ne’e públiku kontinua duvida no tuir lolos lao tuir dalan Konstituisaun RDTL nian. Katak Prezidente Parlamentu Nasionál foun presiza simu pose husi Prezidente Repúblika (PR). Tuir partidu CNRT kompozisaun Parlamentu Nasionál foun ne’e ilegál, tamba la tuir rejimentu Parlamentu Nasionál, nune’e mos Aliansa Maioria Parlamentar (AMP) seidauk dezolve.

Iha  lidun seluk, Sosiedade Sivil husi Luta Hamutuk, Sr. José da Costa hateten Prezidente Repúblika (PR), Dr. Francisco Guterres ‘Lu-Olo’ atu fó pose ba Prezidente Parlamentu Nasional (PPN), Dr. Aniceto Guterres, ne’ebé hala’o ona knar durante fulan hirak nia laran. No VIII Governo Konstitusional ne’ebé lidera husi Primeiru Ministru (PM), Taur Matan Ruak (TMR) prepara Orsamentu Jeral Estadu (OJE) atu lori ba Parlamentu Nasionál.

Maibé kestaun maka, Prezidente Repúblika seidauk fó pose ba Prezidente Parlamentu Nasionál atu lidera plenaria debate Orsamentu Jeral Estadu. Karik Prezidente Repúblika la fó tomada maka públiku nafatin konsidera  Prezidente Parlamentu Nasionál sei ilegál, maske Prezidente Parlamentu Nasionál ne’e hala’o ona ninia servisu durante fulan hirak nia laran.

To’o agora públiku sei duvidas hela ho ezistensia Prezidente Parlamentu Nasionál foun, tanba seidauk simu pose husi Prezidente Repúblika. Iha parte seluk, Sr. Fernando Maia hanesan Xefe Suku dehan PPN foun tenke hetan pose husi Prezidente Repúblika, antes hala’o ninia mandatu.

Prezidente Parlamentu Nasionál ne’e halo ona servisu lubuk ida, seidauk simu pose, Ita hare VIII Governu Konstitusional prepara hela Orsamentu Jeral Estadu 2021 nia atu lori ba halo diskusaun iha Parlamentu Nasionál, osan sei aprova husi Parlamentu maka lori ba Prezidente Repúblika promulga, maibé hare’e pozisaun Prezidente Parlamentu Nasional nian seidauk legál tanba seidauk simu pose husi Prezidente Repúblika. (Fontes: Jornál SUARA TIMOR LOROSAE, 1 Outubru 2020).

Istória Hari’i Orgaun Soberania Parlamentu Nasionál iha Timor-Leste, Liu tiha tinan barak ho luta todan no rezisténsia maka’as hasoru invazor, Timor-Leste konsegue hetan hikas fali ninia Independência iha 20 Maio 2002. República Democrática de Timor-Leste sai hanesan Estado Soberano foun dahuluk iha III Milénio, ho hun iha hakarak povu tomak nian no respeitu ba dignidade ema nian.

Parlamentu Nasionál, ne’ebé eleito liuhusi votu universal, livre, direto, ho valor hanesan, secreto no pessoal, nu’udar órgão soberania RDTL nian ne’ebé reprezenta sidadaun timoroan hotu-hotu no iha kbiit hodi halo ligislação, halao fiscalização no hola decisão polítika. (Tuir Artigo 92 Constituisaun da RDTL haruka). Primeira legislatura dahuluk eleito iha tinan 2001 atu sai Assembleia Constituinte, hodi halo Constituição Timor-Leste nian.

Ho entrada em vigor Constituição da RDTL nian, iha loron 20 de Maio de 2002, Assembleia Constituinte transforma nia-an ba Primeiro Parlamento Nasionál iha Nação Timor-Leste, tuir artigo 176 Constituição da RDTL haruka. Ninia Deputadu/a dahuluk nain-88 fahe ba Bancada Parlamentar 13, ne’ebe hatudu eZemplu di’ak multipartidarismo nian. Importante atu sublinha katak, entre Parlamentar sira ne’ebe eleitor, nain 23 feto, ne’e katak mais ou menos 30%, ne’ebe tama entre taxa sira ne’ebe aas liu iha mundu, no hatudu importansia ne’ebe timoroan fó ba feto. Depois lei hatuur quota minima ba candidate feto, ne’ebé agora dadaun exige katak tem que iha menos feto ida iha kada kandidatu nain-tolu. Iha legislatura atual iha feto nain-26 entre total Deputadu nain-65.

Parlamentu Nasionál nu’udar autoridade legislativa prinsipal iha Timor-Leste, nia iha kompeténsia exklusZvu atu halo kna’ar sira hanesan tuir mai ne’e: halo legislação kona-ba questão básica sira política rai-laran no rai-liur nian, kona-ba direito, liberdade no garantia sira, política da defeza no segurança, política fiscal, halo apreciação ba programa Governo nia, aprova Orçamento Jerál no convenção internasionál sira.

Bele mós fó autorização ba Governo atu legisla kona-bá assunto balu. Parlamentu Nasionál hili no fó posse ba Provedor de Direitos Humanos e Justiça, ne’ebé iha kbiit hodi rona sidadaun sira nia kesar hasoru Poder Público sira no kona-bá violação direitos humanos, no depois encaminha queixa sira ne’e tuir dalan ne’ebe iha. Parlamentu Nasionál nu’udar instrumentu sidadaun nian hodi ezerse ninia direitos liu husi demokrasia representative, no hanesan mós lia-na’in ba vontade povo nian no instituisaun permanente atu kontinua hadi’ak nafatin Estadu de Direitu Demokrátiku. (Fontes: https://www.parlamento.tl/node/340?language=tl, Asesu iha loron, 18 Setembru 2020). 

 Baze Legal : Iha parte ida ne’e, hare husi prespetiva husi ba baze legal nian katak aktu ida ne’e Viola duni Konstituisaun Republika Demokratika Timor-Leste, artigu 99 (3) no Lei Rejimentu Parlamentu Nasional Artigu 17 kona-bá Kompetensia Prezidente Parlamentu Nasional. Konstituisaun Artigu 99 (3) hateten momos katak Parlamentu Nasional Reuni Ordinariamente tuir Konvokasaun Prezidente Parlamentu nian.

Tanba ne’e Vise Prezidente Parlamentu Maria Angelina Lopes Sarmento nia aktu sira ne’e viola Konstituisaun da RDTL, LOFAP, Lei Kodigu Penál, no Lei Rejimentu Parlamentu Nasional. Artigu 86 (f), Hakotu Parlamentu Nasionál, iha kazu krize boot institusionál nian ne’ebé labele iha formasaun governu ka aprovasaun Orsamentu Jerál Estadu nian, iha tempu naruk liu loron neen-nulu, wainhira rona tiha ona partidu polítiku sira-ne’ebé hetan kadeira iha Parlementu Nasionál, no rona Konsellu-Estadu, iha tempu ne’ebé laiha kdasar jurídiku atu hala’o disolusaun. No tuir lolos ne’e, Parlamentu Nasional hein disolusaun husi Prezidente da Republika.

Tamba ne’e Prezidente Sesante Prezidente Parlamentu Nasionál, Sr. Arão Noe kontinua firme hodi defende Konsituisaun da RDTL tuir Artigu 2, (2) katak Estadu Hakruuk ba Lei-Inan Konstituisaun no Lei-Oan sira. Se nune’e, atual Prezidente Parlamentu Nasionál, Dr. Aniceto Guterres ne’e kontinua ilegál la’os legál. Tamba sa maka ilegál, tamba la hetan tomada de pose husi Prezidente da Republika (PR), Dr. Francisco Guterres “Lú-Olo”. Tamba de Jure no de facto laiha. Kontinua ho Prezidente Parlamentu Nasionál ilegál.

Rekomendasaun : Parlamentu Nasionál no Governu dala ruma tarde atu responde sidadaun, maski sidadaun hakarak tebes atu partisipa. Hakaerek nain nia sujestaun katak estratéjia dezenvolvimentu foka ba hadi’a Governu nia abilidade ba fornese servisu públiku sira ne’ebé importante, haforsa instituisaun sub-nasionál sira hodi responde ba sidadaun nia presiza no promove komunidade no sidadaun nia envolvimentu ho governu no instituisaun lokál sira. Ikus liu, Timor-Leste hanesan Estadu Direitu Demokratiku, mai ita hotu kumpri regras Konstitusionais sira ho rigor, atu nune’e bele garante funsionamentu Estadu ne’e tuir tuir Konstituisaun no lei sira ne’ebé vigora.

 *Hakerek Na’in: Alumni Universidade da Paz-(UNPAZ), Faculdade de Direito no Ativista. Artigo ida ne’e larepresenta institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoál. Iha sujestaun ruma bele haruka iha e-mail: moisesvicente59@yahoo.com

 

 

Tinggalkan Balasan